ئیمڕۆ کوێه‌گان شاد و شانازن چه‌مه‌گان ئه‌سرین هه‌ڵپه‌ڕکه‌ی بادن
ئیمڕۆ ئاسمان سه‌مای شمشێر کرد بیستونێ زه‌خمار، ژانی له بیر برد
ره‌نج فه‌رهادێ ناکام و ناشاد، شیرینێ چه‌وه‌یل بێ تاوتر له باد
چین گشتیان ئیمڕۆ، له بیر و له‌یاد داڵاهۆ ئه‌ڕای، ئاران راز وه‌تیاد
بانگه‌واز بکه‌ن بۆشن هزگرن ده‌نگ تیشه تیه‌ید، مه‌ردم گوش گرن!
فه‌رهاد نه‌مردیه، چڕێد شیرین گیان! به‌و ئیمڕۆ دی که‌ن، له‌یه‌کتر عه‌قدمان
گشت عاشقه‌یلیش وه‌یه‌کتر ره‌سن ئه‌و چوار دڵداره‌گ، ته‌نیا و بێ که‌سن
بنویسن وه‌بان ده‌ر ئاناهیتا شکیاد زه‌نجیری به‌رده‌ی بی هاوتا
له ئی دارسانێ چوارسویچ ئه‌سیر شێرێگ باڵا کرد بدڕنێ زه‌نجیر
شیرین جارێگتر، وه‌یاد ره‌نج فه‌رهاد له‌قێگ گوڵێ سوور، له پای بیستون ناد
ئیمڕۆ چوو ئیلام، چوو ده‌وڵه‌تێ ماد داشای مه‌هاباد، چه‌ند رۆڵه شێر زاد
وه ڕوی 4 زه‌خمێ کولیایێ کوردسان وه کۆمارێ کورد ساد قازی ده‌رمان،
له رۆژێ پیرۆز، 2 ی رێبه‌ندان سه‌رمای وه‌فر مرد، چون خوه‌ر هاته‌بان
هزگرن سه‌یرکه‌ن سویر ناز ئه‌وڵاد هه‌ڵپه‌ڕکه‌ی شیرین، شیرین و فه‌رهاد
هزگرن سه‌یرکه‌ن خوه‌ره‌تاو وه‌هار زمسان ته‌واو بی، عه‌ید هاته حه‌سار
شه‌لاق رام کردن شێره‌یلێ مه‌یدان ده‌رسێ ده‌لێری، وه نه‌وه‌یلیان دان
رمانن بوتیل بوتخانه‌ی تاران شکانن پشت و باڵێ نه‌یاران
پشتی راسه‌و بی کوێستانی شاهۆ هاوار کرد کاوه زه‌رده‌شت هاله کۆ!
باید سه‌یرکه‌ید، بوینید ئازادی کوردسان چڕێد ئه‌هورا شوکرێ تۆ یه‌زدان
وه‌لێ حه‌سویده‌یل مه‌کری و سه‌نگ دڵ به‌رچه‌وته‌نگه‌یلێ چه‌په‌ڵ و گه‌ندڵ
جه‌لاده‌یل بێ ره‌حم، گورگه‌یلێ خوێنخوار نه‌یشتن ئازادی، قازی دانه دار
گومان کردن کورد وه کوشتن رێبه‌ر که‌نه ژێرده‌سێ هه‌میشه نه‌وکه‌ر
هوچ گومان نه‌کرد دوژمه‌ن نائاگا وه مه‌رگ هه‌ر قازی، هه‌ر یه‌زدانپه‌نا
هه‌ڵگوردێگ ئاگرین که‌فێدن وه را
هیچ نظری موجود نیست:
ارسال یک نظر